ДЫДЗЫ ХУР

Мæрдты хур, – афтæ йæ хонынц кадджыты, таурæгъты. Дзырд «дыдзыйæн» ис дыууæ нысаниуæджы: дыдзы арахъ, ома, дыууæ хатты уагъд арахъ; дыдзы хур та амоны уæлæнгай, гæзæмæ чи кæсы, ахæм хур. Изæрыгæтты хур куы æрныгуылы æмæ ма хæхты фæсфæхстыл, цуппытыл цы хуры тынтæ фæхъазынц, уыдон. Мæрдты хур та йæ уымæн хонынц æмæ, ирон динон уырнынадмæ гæсгæ, Мæрдты бæстæм хурныгуылды бахизæн, бацæуæн нæй, уыцы афон ныгæнгæ дæр уымæн нæ кæнынц. Æмæ кадджыты, таурæгъты мæрдтæй рацæуæг хъайтар фæстæмæ здæхгæйæ, кæд ыл хур аныгуылы, уæддæр ма йæ тынты, цæхæр æрвгæрон хæхтыл кæй не ‘рмынæг, уымæй фæпайда кæны, æмæ йæ Аминон бауадзы. Афтæ кадæг «Уырызмæджы æнæном лæппу»-йы Уырызмæг æмæ Сатанайы æдзард фырт йæ фыдимæ стæры фæстæ Мæрдты бæстæм куы здæхт, уæд æй Сатана фæсте асырдта, фенон æй, зæгъгæ, лæппу йæм не ‘рлæууыд, тагъд кодта, мæрдты дуар куы сæхгæной, зæгъгæ, фæлæ уæддæр айрæджы кодта, æмæ йæ мидæмæ нал уагътой. Уæд ын Сатана скуывта: «Хуыцæутты Хуыцау, мæ Хуыцау, кæд ды мады зæрдæйы кæсын зоныс, уæд ма хæхтыл дыдзы хур æрбакæсын кæн». Æмæ уæд хæхтыл дыдзы хур æрбакаст. Дуаргæс та Мæрдты дуар бакодта. Лæппу, мидæмæ бахизон, зæгъгæ, куыд загъта, афтæ ма иу здæхт фæкодта Сатанамæ. Сатана йын йæ фæдджитæ æмæ йæ цæсгом иу уынд акодта æмæ лæппуй-ыл йæ къухдарæн фехста. Къухдарæн лæппуйæн йæ къухыл абадти, æмæ йæ йемæ мæрдтæм бахаста.

кæс «АРВЫ ДУАР»-Ы СÆРГÆНДТÆ